" لو ما لسعتش ما حدش هيحس بيك "
مش مصدقني ؟!! طب أقولك على حاجة .. لما بتولع عود كبريت وبتنساه في ايدك بتحس بيه امتى ؟؟
طبعاً أول لما يوصل لصوابعك ويلسعك .. طول ما هو عمال يتحرق من غير فايدة وبعيد عنك مش حاسس بيه
رغم انه بيكون منور لكن كتير أوي ممكن ما تكونش شايف النور لأنك
" ملهي " في حاجة تانية عامية عينك ومنسياك .
في حاجات كتير أوي في الدنيا دي لو ما لسعتناش مانحسش بيها .. ما نحسش ليها بفايدة ولا طعم ..
الشوربة لو ما كانتش تلسعك وانت بتشربها تحس انها " باردة " وانها مالهاش لازمة وانك اتأخرت كتير على شربها .. الشطة لو ما كنتش تلهلب لسانك تقول عليها شطة مغشوشة .. المكوة لو ما كانتش تلسع إيدك لو لمستها تقول عليها باظت .. البشر كمان من ضمن الحاجات اللي لو ما لسعتش ما نحسش بيها .. لو ما كنتش تسيب أثر في المكان اللي تقعد فيه ماحدش هيفتكر انك كنت موجود أصلاً .. بالظبط زي الفرق بين عود كبريت ونقطة ماية وقعوا على ورقة .. نقطة الماية بعد دقايق بتنشف والكل بينسى انها كانت هنا .. لكن عود الكبريت لو وقع على الورقة بيسيب مكانه أثر .. لو جه حد بعد خمسيين سنة هيلاقى أثر على الورق ويعرف ان في نار عدت عليها .
خليك زي النار .. السع اللي حواليك لسعة خفيفة .. لسعة دفا .. تحسسهم انك موجود ، انك حواليهم ، ولو غبت يحسوا ان في فرق .. ان في حاجة مهمة أوي ناقصاهم .. النار بتدي أمان وبتدي في نفس الوقت خوف ..
النار محتاجة حد بجد يفهمها .. لو فهمها واتعامل معاها صح ، عرف حدوده معاها هيعرف ياخد منها الأمان .. لكن اللي مش هيقدر يفهمها .. اللي هيفتكرها لعبة هيتحرق بيها .
النار ثواب وعقاب في نفس اللحظة .. ممكن تدفي وممكن تحرق .. ممكن تكوي جرح وتداويه وممكن تكوي الجلد وتشوهه .. ممكن تنور الطريق وممكن تسده وتقطعه ..
خلي أفعالك ، تصرفاتك ، كلماتك .. كل حاجة تصدر عنك زي النار .. ليها أثر ، ليها فايدة ، ليها مذاق مختلف .. حتى لو وجعت الناس في البداية لكن بعد كده ان طال الوقت ولا قصر هيكتشفوا انهم كانوا محتاجين النار دي .. كانوا محتاجين اللسعة دي علشان يفوقوا أو علشان يتداوا أو علشان يتعلموا ..
عارف ازاي تبقى لاسع زي النار ؟؟
أقولك يا سيدي .. عمرك شوفت نار" كده وكده " ؟؟ ولا نار " تقليد" ؟؟ طبعاً لأ .. النار كلها حقيقية ..
و" الحق" زي النار .. مميز ومختلف .. ساعات بيوجع وساعات بيحرق وساعات يدفي ويفيد ويداوي ..
علشان تكون لاسع .. لازم تكون " حقيقي " لازم تكون مع الحق .. وعلشان تكون لك قيمة في الدنيا دي وبصمة وفايدة ... لازم تكون لاسع .
كلامي مش شرط يكون صح .. ومش شرط تقتنع بيه .. لكن أنا حساه
" حقيقي " .. علشان كده اقتنعت بيه وبقوله للناس .. علشان لو صح الناس تعرفه .. ولو غلط الناس تعرفني انه غلط ..
كلامي هنا دايماً – ان شاء الله – هيكون عن حاجات لاسعة .. حاجات – أظنها – حقيقية في حياتنا ... هتكلم عنها على أساس انها " حقيقية " إلى أن يثبت العكس .. اللي انتوا ممكن توضحوه ليا .
مش هقولكم كلامي هيكون عن إيه بالظبط .. لسببين .. الأول : لأني كل ما بكتشف حاجة لاسعة بتكلم عنها ، وانا متأكدة ان الدنيا مليااااااااااانة حاجات لاسعة لكن مش عارفة هي إيه بالظبط .
والتاني : لأني عمري ما عرفت أمشي على السطر .. يعني مش هقدر أقول انا بعد بعد بكرة هتكلم عن كذا وبعد بعد بكرة يجي وأقدر فعلاً اتكلم عن كذا ... يمكن دا عيب أو دي ميزة مش عارفة .. نبقى نتكلم بقى في الموضوع دا بعدين لحسن شكلي كده رغيت كتير .
مش مصدقني ؟!! طب أقولك على حاجة .. لما بتولع عود كبريت وبتنساه في ايدك بتحس بيه امتى ؟؟
طبعاً أول لما يوصل لصوابعك ويلسعك .. طول ما هو عمال يتحرق من غير فايدة وبعيد عنك مش حاسس بيه
رغم انه بيكون منور لكن كتير أوي ممكن ما تكونش شايف النور لأنك
" ملهي " في حاجة تانية عامية عينك ومنسياك .
في حاجات كتير أوي في الدنيا دي لو ما لسعتناش مانحسش بيها .. ما نحسش ليها بفايدة ولا طعم ..
الشوربة لو ما كانتش تلسعك وانت بتشربها تحس انها " باردة " وانها مالهاش لازمة وانك اتأخرت كتير على شربها .. الشطة لو ما كنتش تلهلب لسانك تقول عليها شطة مغشوشة .. المكوة لو ما كانتش تلسع إيدك لو لمستها تقول عليها باظت .. البشر كمان من ضمن الحاجات اللي لو ما لسعتش ما نحسش بيها .. لو ما كنتش تسيب أثر في المكان اللي تقعد فيه ماحدش هيفتكر انك كنت موجود أصلاً .. بالظبط زي الفرق بين عود كبريت ونقطة ماية وقعوا على ورقة .. نقطة الماية بعد دقايق بتنشف والكل بينسى انها كانت هنا .. لكن عود الكبريت لو وقع على الورقة بيسيب مكانه أثر .. لو جه حد بعد خمسيين سنة هيلاقى أثر على الورق ويعرف ان في نار عدت عليها .
خليك زي النار .. السع اللي حواليك لسعة خفيفة .. لسعة دفا .. تحسسهم انك موجود ، انك حواليهم ، ولو غبت يحسوا ان في فرق .. ان في حاجة مهمة أوي ناقصاهم .. النار بتدي أمان وبتدي في نفس الوقت خوف ..
النار محتاجة حد بجد يفهمها .. لو فهمها واتعامل معاها صح ، عرف حدوده معاها هيعرف ياخد منها الأمان .. لكن اللي مش هيقدر يفهمها .. اللي هيفتكرها لعبة هيتحرق بيها .
النار ثواب وعقاب في نفس اللحظة .. ممكن تدفي وممكن تحرق .. ممكن تكوي جرح وتداويه وممكن تكوي الجلد وتشوهه .. ممكن تنور الطريق وممكن تسده وتقطعه ..
خلي أفعالك ، تصرفاتك ، كلماتك .. كل حاجة تصدر عنك زي النار .. ليها أثر ، ليها فايدة ، ليها مذاق مختلف .. حتى لو وجعت الناس في البداية لكن بعد كده ان طال الوقت ولا قصر هيكتشفوا انهم كانوا محتاجين النار دي .. كانوا محتاجين اللسعة دي علشان يفوقوا أو علشان يتداوا أو علشان يتعلموا ..
عارف ازاي تبقى لاسع زي النار ؟؟
أقولك يا سيدي .. عمرك شوفت نار" كده وكده " ؟؟ ولا نار " تقليد" ؟؟ طبعاً لأ .. النار كلها حقيقية ..
و" الحق" زي النار .. مميز ومختلف .. ساعات بيوجع وساعات بيحرق وساعات يدفي ويفيد ويداوي ..
علشان تكون لاسع .. لازم تكون " حقيقي " لازم تكون مع الحق .. وعلشان تكون لك قيمة في الدنيا دي وبصمة وفايدة ... لازم تكون لاسع .
كلامي مش شرط يكون صح .. ومش شرط تقتنع بيه .. لكن أنا حساه
" حقيقي " .. علشان كده اقتنعت بيه وبقوله للناس .. علشان لو صح الناس تعرفه .. ولو غلط الناس تعرفني انه غلط ..
كلامي هنا دايماً – ان شاء الله – هيكون عن حاجات لاسعة .. حاجات – أظنها – حقيقية في حياتنا ... هتكلم عنها على أساس انها " حقيقية " إلى أن يثبت العكس .. اللي انتوا ممكن توضحوه ليا .
مش هقولكم كلامي هيكون عن إيه بالظبط .. لسببين .. الأول : لأني كل ما بكتشف حاجة لاسعة بتكلم عنها ، وانا متأكدة ان الدنيا مليااااااااااانة حاجات لاسعة لكن مش عارفة هي إيه بالظبط .
والتاني : لأني عمري ما عرفت أمشي على السطر .. يعني مش هقدر أقول انا بعد بعد بكرة هتكلم عن كذا وبعد بعد بكرة يجي وأقدر فعلاً اتكلم عن كذا ... يمكن دا عيب أو دي ميزة مش عارفة .. نبقى نتكلم بقى في الموضوع دا بعدين لحسن شكلي كده رغيت كتير .
